MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
10
Item het was een man van Utrecht, die zoe groet gebreck had vanden steen, dat hij iij weecken lanck lach, dat hem dochte daer aen te sterven, alzoe dat hij mit zijnen vrienden hem selven overgaff om laeten te snieden. Ende d’meijster quam daer, dan en conde die steen niet vijnden, alzoe dat d’meijster thuijs ghijnck. Terstont quam hem in zijnen sinne van Onser L. Vrouwen genade t’Amersfoert. Hij loeffde zijn bevaert ende binnen een ure daer nae heeft hij den steen vernomen, daer hij off verlost is. Ende is hier gecomen mit d’steen ende heeft zijn bevaert gedaen.
11
Item het was een man van Campen, die mit een deel luijden onder Noerwegen lach, daer zij also seer bestoeckt worden mit een sturm, dat zij all meenden verdrenct te hebben. Alzoe dat d’schipper seijde: “Lieve gesellen, laet ons onse bevaert looven ten heijlighen bloede.” Zij loten daer een vuijt die zijn bedevaert daer loeffde, dat hem niet en baete. Zij loefffden haer bevaert t ‘Aecken, des gelijcxs oock ten Bosch, dat haer all nijet en halpe. Ten laesten lach daer een int schip, die zijn sonden overdacht. Die quam in zijn sinne van Onser L. Vrouwen beelde t’Amersfoert, dat inden water gevonden was. Hij loeffde zijn bedevaert, wollen en bervoets ende sonder vleijsch te wesen, thent hij zijn bevaert gedaen hadde ende terstont is dat weder gebetert en zijn behouden te lande gecoemen. Ende hij quam en dede zijn bevaert.
12
Item het was een man van Utrecht, d’alzoe cranck was, dat hem d’meysters overgegeven hadden. Hij viel in een slaep, daer hem in zijn sinne quam van Onser L. Vrouwen ghenade t’Amersfoert. En doe hij ontwaecte, loeffden hij zijn bedevaert te doen, wollen ende bervoets. Ende hij is wederomme gesont geworden.
