MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
27
Item het was een kijndt van Hilffersom, dat lange wijele verdrenct was. Die ouders loeffden hier haert bevaert ende te hant is het kijndt ontworpen ende gesont geworden.
28
Item het was een knecht van Wasen, die zijeck was van Sint Quirijn, alzoe dat zijn hacken aen zijn leijnden laghen. Hij loeffde Onse L. Vrouwe te versoecken ende doe is hij op krucken beginnen te gaen. Hij is gecoemen en heeft zijn bevaert gedaen ende is gesont wederom gereijst ende heeft hier zijn krucken gelaeten.
29
Item was het een man van Wasen, die verdrencte ende doot lach van des avonts tot des middernachts. Zijn meijster, daer hij mede woenden, loeffden zijn bevaert ende die man wert weder levende ende heeft hier zijn bevaert gedaen.
30
Item het was een vrou, die woenachtich was in die xviij hoeven. Ende was op een stoel wel ij off dardalff ure beswijmt. Die man loeffdese laeten te weghen mit wijn ende mit weijt voor Onse L. Vrouwe ende zij wert gesont.
31
Item het was een man van Utrecht, die quam mit een meijsken doer Aermelre Zant. Daer quamen hem drie rhuijter teghen, die hem off hieten leggen ende schoeten nae hem. Nu riep hij Ons L. Vrouwe aen ende sette hem ter weer, alzoe dat hij den eenen vanden paerde stack ende sloech hem doot mit zijns selffs sweert. Ende hij wert vanden rhuijteren verlost.
