MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
67
Item op den selfden dach, doe men hier Onse L. Vrouwen processie dede om d’stadt ende veel volcxs hier bevaert gecoemen was, sonderlijnge vuijt die stadt van Utrecht. Des avonts, als dat volck weder t’Utrecht quam, doe saten een deel ionger mannen in een herberghe te samen ende spraecken spottelicke woerden op Onser L. Vrouwen beeldt, dat t’Amersfoert inden water gevonden wert. Sich, een van die sievenen, die daer meest mede spottende, quam terstont een brocke broets in zijn keel, dat hij also swert wert om zijn hoeft, dat zijn gesellen meenden, dat hij terstont gestickt soude hebben. Daer loefden zij altesamen haer bevaert tot Onser L. Vrouwen ende nemmermeer daer mede spottende te zullen zijn. Ende hij is weder tot zijn selven gecoemen ende heeft mit zijn gesellen hier zijn bevaert gedaen.
68
Item het was een man van Deventer, die zijn soon seer swaerlicken beseten wert mitten boose gheest. Dit geschiede omtrent vespertijt. Ende hier nae omtrent middernacht soe loeffde die vader ende zijn soen all haer leven lanck Onse L. Vrou te dienen ende t’Amersfoert onse L. Vrouwen beeldt, dat inden water gevonden wert, alle iaer te versoecken. Ende terstont wert d’zoen voerseijt gesont, daert veel luijden saghen.
69
Item het was een man van Monkendam, d’mit zijn kijndt groet gebreck hadde van die saghe. Hij loeffde zijn bevaert t’Amersfoert tot Onse L. Vrou op die selfde tijt werden zij beijde gesont.
70
Item het was een wijff van Sterwoude bij Steenwijck, die groet gebreck had een iaer lanck vanden water ende sonderlijnghe alzoe swaer elff weecken, dat zij meende te splijten. Zij loefde haer bevaert t’Amersfoert tot Onser L. Vrouwen ende dat water ghijnck haer off bij halff emmeren t’effens.
71
Item het was een vrou van Woldzeijn, die inden bedde gelegen had xxiiij weecken lanck, dat zij haer selven niet roeren en conde in alle haer leden. Zij loeffde Onse L. Vrouwe t’Amersfoert te versoecken mit een sonderlijnghe gebet. Ende zij is wederomme gesont geworden.
