MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
103
Item het was een man, woenende bij Gorijchem d’doeff, blijnt ende bijster zijnre sinnen was. Hij loeffde zijn bevaert tot Onse L. Vrouwen t’Amersfoert. Ende is alles genesen.
104
Item het was een priester buijten Steenwijck in die Drent, die werpt een man mit eenre tanghen inden slaep vanden hoeffde, dat zij nijet anders en wisten, dan hij doot en was, ende zij wouden hem leggen op dat stroeij. Die vrouwen, die daer bij waren, loeffden haer bevaert ten heijlighen bloede ende op anderen steden ende ten halp hem nijet. Doe loeffden zij haer bevaert t‘Amersfoert tot Onser L. Vrouwen ende doe keerde hij hem omme. Ende is voerts gesont geworden.
105
Item het was een vrou van Berrichem, d’had een kijndt, dat iij daghen een span in zijn keel gehadt hadde. Ende d’moeder loeffde hier haer bevaert ende dat kijndt wert des spannes quijt.
106
Item het was een vrou van Rhenen, die had een kijndt, dat een ure doot was geweest. Zij loeffde haer bedevaert Onse L. Vrouwe t’Amersfoert te versoecken ende terstont ontwerpt het kijnt eende wert gesont.
107
Item het was een man, die langhe tijt geschuert hadde geweest. Hij loeffde zijn bevaert Onse L. Vrou t’Amersfoert te versoecken ende hij wert gesont.
108
Item het was een jonckman te Parijs, die daer had een zeere voet, daer hij nijet en mocht op stoenen. Ende hem docht, dat die meijsters zijn voet meerder verderffden, dan zij beterden. Hij koft een peert om op te rieden van Parijs tot Brugge. Doe hij vj mijelen was gereden, doe stortede dat peert ganck over ganck ende hij en conde nijet gaen. Doe loeffde hij Onse L. Vrou te versoecken t’Amersfoert, eer hij t’huijs quam ende dat peert stortede nijet meer. Ende zijn voet wert gesont.
