MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
132
Item het was een kijndt vander Goude, dat blijnt geworden was aen d’pocken. Die moeder loeffde haer bevaert Onse L Vrouwe te versoecken t’Amersfoert. Ende het kijndt wert wederomme siende.
133
Item het was een man van die Wijck op zee, die een vierdel iaers beseten was vanden boosen gheest. Sijn huisfrou loeffde haer bevaert Onse L. Vrou t’Amersfoert te versoecken mit een wasschen beelde. Zij toech mit hem op die reijse ende hoe zij naerder Amersfoert kwamen, hoe hij daer beter aen was. Ende hij heeft zijn bevaert gedaen ende is verlost.
134
Item het was een vrou van Montfoert, die een bueijck had soe groet, off zij twe kijnderen gedragen had ende geen meijster van haer zuket konde gechriegen. Zij loeffde haer bevaert tot Onser L. Vrouwen ende haer bueijck wert weder cleijn.
135
Item het was een kijndt van Deventer, dat over zijn borst gevaren wert met een waghen vol rogghen mit het eene radt, alzo dattet kijndt vijff uren voor doot lach. Die vrienden loeffden haer bevaert tot Onse L. Vrou t’Amersfoert ende dat kijndt wert te handt wederomme levendich.
136
Item het was een man vuijt Zeelandt bij Zijrcxzee, die van raserie zijn haer ende zijn wanghen toech ende hem selven quaet dede, daer hij conde. Ende oock nijet en conde slapen noch rusten. Zijn vrienden sijnt mit hem gecoemen voer Onse L. Vrouwe ende hij is voert beeldt gesont geworden ende wederom wel te pas.
