100019b_.html
100018b_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

157

Item het was een vrou vuijt Den Haghe, die des avonts verveert wert, alzoe dat zij haestelick in haer huijs liep ende brack haer arm, want haer docht, dat zij een swarten man sach. Ende doe zij om een reedelick loon geen meijster conde gecriegen, sprak zij: “Maria zall mijn helpen.” Zij heeft haer bevaert t’Amersfoert geloefft ende haer arm is sonder enighe meijsterie geheelt.

158

Item het was een man gevangen tot Amersfoert op zijn lijff, want hijt geleijde gebroecken hadde. Ende hij was gesloeten in een stercke bout. Hem quam in zijn sinne, dat hij aenroepen soude die Maghet Maria ende hij is des nachts opgestaen ende viel op zijn knijen ende las vijff Ave Maria. Hij sette zijn hant aent slot ende het brack op. Ende hij is gecoemen tot Onser L. Vrouwen ende offerden den swaren ijseren bout, als daer noch hanget boven Onser Vrouwen. Als dat onser borgemeijster vernam, gaven zij den gevangen Onser L. Vrouwen om des mirakels wille. Ende is quijt geschouwen ende is t’huijs gegaen.

159

Item het was een knecht van Boemel van xv iaeren. Dese soude baden mit ionghe knechtern op een diep scoer oever, daer hij onversienlick insanck, Hij riep Onse L.Vrouwe aen ende lach inden gront wel een vierdel van eenre uren. Zijn gesellen sloeghen in den gront, daer zij vermoeden hem te wesen ende mit d’hulpe Onser L. Vrouwen sloech hij ij vijngeren aen die roede ende is gesont hier gecoemen. Ende heeft beliet, hoe het mit hem geschiet was.

160

Item het was een man vuijt Enghelandt cc ende xx mijelen boven Lonnen, die op zijn bedde lach, ontsteecken mit Sint Anthonis vuer, all swert over zijn been, datmen des anderen daghes off gesaghet soude hebben. Ende inder nacht docht hem, dat hem geseijt wert: “Loeft U bevaert t’Amersfoert”. Dat hij dede ende nijet en wiste, waer Amersfoert was, daer hij nae vraechde. Ende quam en dede zijn bevaert, sterck ende gesont. Maer dat been was wat roode.