MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
165
Item het was een schipman van Danswijck vuijt Pruissen ende quam zeijlen in die zee mit een groet schip, daer inne waren wel xv mannen. Doe stack hem aen een grote sturm, dat zij schipbroeckich worden ende alle bedorven vuijtgesondert dese man, quam op een tafel ende dreeff IX uren inder zee. Hij wert denckende op Onser L. Vrouwen t’Amersfoert, die hij loeffden daer te versoecken mit een scherp haren cleet over zijn blote lijff ende doe was hij noch wel vij mijelen vanden lande. Doe dat geschiet was, sach hij vuijtten Oosten coemen een schoene claerheijt ende daer mede een cleijn beeldeken van Onser L. Vrouwen ende te handt is hij mit den tafel aent landt geset ende heeft dat haren cleet aengetoghen ende droech dat dach ende nacht ter tijt toe, dat hij zijn offerhande gedaen hadde. Ende hij seijde claerlick, dat beeldeken, dat hij in die zee mit dier claerheijt gesien had, gelijck was, dat hij hier sach ende inden water gevonden is. Ende hij hangede dat hare cleedt voert t’beeldt van Maria, als ghij sijen moghet daer hanghen voer Maria.
166
Item het was een ionghe vrouw, woenende bij Haerlem, die beroert wert verveerlick vander popelsie, alzo dat haer een zijede all lam was en die mont was haer bij dat oer getoghen. Zij loeffde haer bevaert t’Amersfoert ende zij wert weder wel gesont van leden. Als zij haer bevaert had gedaen, schaemden zij haer, dat den priester te segghen van hoverdijen ende ghijnck vuijt der kercken. Te hant quam zij weder lopen voer Maria beeldt, bezuket ende beroert schreijende ende roepende: “O Maria, en wilt mij nijet plagen. Ick wilt gerne segghen, op dat ghij overmits mij moeghet geëert worden. Ende t’hant wert zij weder gesont ende ghijnck mit blijschappen weder t’huijs.
167
Item het was een man van die xviij hoeven, die vijff daghen blijnt en doeff was geworden. Hij loeffde Onse L. Vrou te versoecken ende hij wert weder siende ende horende.
