100022a_.html
100021a_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

171

Item het was die coster van Swartewael bijden Brijel, die groet gebreck had aen den steen. Hij loeffde zijn bevaert tot Onser L.Vrouwen t’Amersfoert ende binnen een halff ure ghijngen hem viij steenen off. Ende hij wert gesont.



172

Item het was een maechdeken vuijt dat Grote broeck van ix iaeren, die stom was ende altemael verleemt, dat zij nijet gaen en conde vijff vierdel iaers lanck. Die ouders loeffden haer bevaert mitten kijnde te weghen mit wijn ende weijt tot Onser L. Vrouwen. Ende dat kijndt wert weder spreeckende ende gaende gelijck te voerens.

173

Item het was een maechdeken te Campen, dat all bijster haerre sinnen was.  Haer quam te voeren in haer slaep, dattet tot Amersfoert trecken soude tot Onser L. Vrouwen ende doen daer haer bedevaert. Ende doe dat maechdeken ontwaeckende wert, sprack het haerre moeder toe ende seijde: “Treckt mit mij t’Amersfoert tot Onser L.Vrouwen, ick ben all gesont.” Ende ten woude te voeren noch eten noch drincken, dattet doe wel dede. Ende het heeft haer bevaert gedaen. Ende is wederomme gesont geworden.

174

Item het was een man van Amstelredam, d’alzoe grote pijn in zijn keel hadde, dat hij nerghens gedueren en conde. Hij loeffde zijn bedevaert tot Onser Liever Vrouwen t’Amersfoert. Ende hij wert wederomme gesont ende wel te pas.