MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
178
Item het was een man van Enchusen, die quam van Hamburch ende soude varen t’Amstelredam, doe hij quam tusschen die Elve ende tVlij. Ende zij dreven twe daghen mit een nacht op Goedts genade ende zij meenden te hant te drencken. Ende d’schipper vant schip loeffde Onse L. Vrouwe t’Amersfoert te versoecken. Terstont zeijlde hij te lande sonder enich gebreck.
179
Item het was een man van Bebbergen ende had xx iaern lanck doeff geweest. Ende hij loeffde zijn bevaert tot Onse L. Vrouwen t’Amersfoert ende hij wert hoorende. Ende hij quam en dede zijn bevaert, als hij geloeft hadde.
180
Item het was een Rijck mans kijndt vuijt den Haghe, out iiij iaeren, ende was soe vol waters, datmen in zijn coussen wel solden hebben gesteecken een mans been. Die ouders loeffden haer bevaert t’Amersfoert. Ende des nachts vandtmen des kijndts water op zijn bedde ende d’moeder bracht dat kijndt gesont ende smalle tot Maria.
181
Item het was een ionck knecht van Hogesueren, die hadde gebroecken zijn been, alzoe dat Sint Anthonis vuijer daer aen quam, datment off solde hebben gezaget. Hij loeffde zijn bevaert t’Amersfoert ende t’hant binnen een corte tijt wert hij gesont. Hij versuemde zijn bevaert, soe hij geloeft hadde, te hant wert hij doeff. Doe sprack hij: “O Maria, ic love u, ick zall coemen doen mijn bevaert.” Hij wert weder hoorende; ende hij dede zijn bevaert mit blijschappen.
