MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
185
Item het was een knecht olt x iaeren ende creech die koerts seer verveerlicken; daer toe creech hij seer swaerlick Sint Cornelis plaghe, wel vijff werff in twe uren, ende had wel vijff werff die keerse in zijn handen van cranckheijt. Die vrienden loeffden haer bevaert t’Amersfoert. t’Hant wert hij gesont ende wert nijet meer zijeck van Sint Cornelis plaghe.
186
Item het was een man van Bercoop ende was cruepel geweest in zijn een been, overmits die ijchte. Hij loeffde zijn bevaert t’Amersfoert ende t’hant quam hij t’Amersfoert, sterck ende machtich zijnre beenen, ende dede zijn bevaert mit blijschappen.
187
Item het was een ionghe maghet van Mouwerick ende creech een verveerlick aensicht, geswollen ende zeerich, als off zij melaets had geweest, datmen haer nues off oghen nijet en conste gesien. Watmen meijsterden het en baeten nijet. Doe loeffde die maghet haer bevaert tot onse L. Vrouwe t’Amersfoert; een halff ure daer nae wert zij soe schoen in haer aensicht als zij ije geweest had. Ende zij dede haer bevaert blijdelick.
188
Item het was een man van Hemert ende viel van een hoghen boem, alzoe dat hij wel vj uren lach op die aerde, datmen geen teijken des levens aen hem en vant, maer stijff ende colt lach als een doot mensche. Als zijn wijff ende naeburen schreijden ende aenriepen Maria van Amersfoert, ontwerpt hij ende sprack van wonderlicke dingen ende saecken en verveerlicke punten, die hij gesien hadde. Ende te hant daer nae quam hij en dede zijn bevaert.
