MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
188
Item het was een man van Hemert ende viel van een hoghen boem, alzoe dat hij wel vj uren lach op die aerde, datmen geen teijken des levens aen hem en vant, maer stijff ende colt lach als een doot mensche. Als zijn wijff ende naeburen schreijden ende aenriepen Maria van Amersfoert, ontwerpt hij ende sprack van wonderlicke dingen ende saecken en verveerlicke punten, die hij gesien hadde. Ende te hant daer nae quam hij en dede zijn bevaert.
189
Item het was een vrou van s’Hertoghen bosch ende was swaerlick gepijnicht vanden steen ende haer en mocht geen meijster helpen, zij wert cranck ter doot toe. Zij loeffde haer bevaert tot Onse L.Vrou t’Amersfoert ende te hant ghijngen haer off twe steenen, die meeste was wel soe groot als een cleijn hennen eije. Ende wij saghen den steen. Ende zij quam blijdelick ende dede haer bevaert.
190
Item het was een man van Tiel ende was lange tijt blijnt geweest mit zijn een oghe, als hij hoerde, dat daer een maghet vuijt den cleijne begijnhuijs van Tiel siende geworden was. Doe loeffde hij zijn bevaert aen Onse L. Vrouwe t’Amersfoert ende te hant wert hij siende. Ende quam mit blijschappen en dede zijn bevaert.
191
Item het was een man van Harderwijck ende was lange bezuket geweest van den water seer swaerlick. Doe riedt hem die pastoer, off kerckheer, dat hij zijn bevaert soude love tot Onse L.Vrou tot Amersfoert ende te hant wert hij gesont ende schoen van lichaem, als hij ije geweest hadde. Ende dede zijn bevaert mit blijdschappen.
