100025b_.html
100024b_.html

FACSIMILE



MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

194

Item het was kijndt van Jutfaes, ende was lange tijt cruepel ende lam mit beijen beenen. Die olders loeffden haer bevaert tot Onse Lieve Vrouwe t’Amersfoert ende dat kijndt bestont te gaen ende dede zijn bedevaert.

195

Item het was een kijndt geboren van Aelst, ende was zeer swaerlick bezuijcket van Sint Cornelis plaghe, en deden haer bevaert tot Sint Cornelis, maer t’kijndt wert weder zijeck. Doe loeffden die olderen  haer bevaert mitten kijnde tot Maria t’Amersfoert ende dat kijndt wert  nijet meer bezuijcket. Ende quamen mit blijdschappen en deden haer bevaert danckende Maria.

196

Item het was een vrou van Zwolle ende hadde iij ionge kijnderen: dat een viel doot van een solre; dat ander kijndt sat ende att appelen; daer quam een vercken en beet hem off beijde zijn handen; dat derde kijndt wert van haer buers kijndt int spuelen offgesteecken zijn keel. Als dit die moeder sach van ongenuechten wert zij cranck van sinnen, alzoe datmense bracht te Gheel te pilgrimaers. Zij bleeff all onsinnch. Daar nae loeffden zij ende haer vrienden tot Maria in Amersfoert ende zij quam zedich ende sijnnich en dede haer bevaert ende danckte Maria.

197

Item het was een man van Swolle ende hadde gehadt lange den coorts; t’hant wert hij die coorts quijt. Doe bestont hem een grote geswelling in der keele, alzoe dat hem d’spraeck ontgijnck ende als hem die stadsmeijster besach, sprack hij: “Ick en weet geen raedt ten lijff te raden, dan dat hij biechte, ende bereijde hem te sterven.” Antwoerde die ziecke man: “Soe love ick Maria te dienen, ende mijn bevaert te doen”, ende te hant wert hij gesont en dede zijn bevaert mit blijschappen.