MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
260
Item inden selven jaere was een jonckman, woenede te Eckekedam bij Gorchem, die vuijt zijn werck quam, daer hij gesloet hadde, toe huijs. Ende vandt zijn wijff nijet thuijs, maer zijn kijndt in die wijeghe schrijen. Ende als dat wijff quam, soe toech hij zijn mes op haer. Ende zij en dorste hem nijet verbeijden. Doe nam hij een kanne biers ende ghijnck soe vervolgen tot den acker, ende als hij over een tuijn soude treden, stont die vijandt vander hellen en woude hem die handt geven om hem te helpen en seyde: “Vriendt, en truert niet. Ick weet gelts genoech voer dij.”Ende dese man liep haestelick bij zijn vader ende die mit hem werckende waren, ende dranck in desen mede. Ende terstont werpt hij den kan van hem ende beerde als een vuijt zijne sinne en beseten was, soe dat zijn vader mit hem sessen nauwe in een kamer mochten houwen. Ende als deze mensche lach in dese quelle, soe quam hem te voeren in sinne, als dat hij t’Amersfoert Onse L. Vrouwe soude versuecken, en toe Hoecklom. En soe vroech als hij voor den beelde quam, wert hij verlost vanden vijandt. Ende hij heeft zijn bevaert gedaen mit zijn vader ende een ander man. Ende hij is gesont t’huijs gegaen.
261
Item inden selven jaere quam een coepman varen mit een schip weijts tusschen Vlaenderen ende Zeelandt. Ende ten stormenden noch ten waeijden nijet, maer dat schip alleijnskens nam water in ende begon te sijncken. Ende zij en conden geen gat daer aen vijnden. Ende als zij oosden off rusten, soe bleeft all in een punte. Ende als zij in deser grote vresen waren, soe loeffde die coepman Onser L. Vrou t’Amersfoert te versuecken mit een waskeers van een pont ende een silveren beeldt. Ende altehant soe quamen zij te lande, gans ende geheel. En dese coepman heeft zijn bevaert volbracht des Maenendachs nae reminiscere.
