MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
314
Item het was een man van WestDelft, die op S. Agnieten dach sat en dronck mit goede luden in een herberch, daer hij beroert wert mitter popelzie aen zijn rechter zijde van handt en voet. Ende in die tonghe, dat hij nijet spreecken en konde, t’welck duerden wel iij uren lanck. Hij loeffde in hem selven zijn bevaert Mariam t’Amersfoert te versucken. Altehandt wert hij spreeckende ende alinge gesont aen handen ende voeten.
315
Item het was een wijff ij mijelen boven Nijmmeghen verwaerende haer nicht, die beseten was mitten boosen gheest. Ende deze wert daer van also vervaert, dat haer dochte nacht en dach, nae haer nichtge doot was vander raserien, dat haer die viandt volchde, waer dat zij ghijnck off stont. Ende haer docht, dat die viandt haer des nachts bijder keele nam, dat zij nauwelick haer adem konde halen. Maer zij hoerden den viandt wel schateren, oft een aechster geweest had. Deze vrou loeffden in haer selven te versuecken Onse L. Vrou t’Amersfoert. Ende te handt wert zij gesont. Ende dat duerden wel vj weecken lanck, dat zij mit den vijandt soe becoemert was.
316
Item het waren schipluden in die zee en hem quam haestelijken een grote sturm over, dat het schip brack, daer zij innen waren, soe dat zij onder hem XV clamen in dat boodt en rechtevoert quam daer een ghulff off een waghe en sloech dat boodt om, soe zij doe onder hem xiiij dreven, dat zij quamen op een wrack van den schepe, daer hem dat water overt liep, dat zioj andersd nijet en meenden, dan daer te sterven. Ende in deze grote noodt riepen zij Onse L. Vrou aen en loeffden haer bevaert t’Amersfoert. En rechtevoert was daer een man in een ander schip, ende had medelijden mit d’geene, die hij ijn noodt sach. Ende seyde tot zijn gesellen, dat hij hun helpen woude. Doen d’ander seyden, zij en woudens niet doen, antwoert hij en seyde: hij souse helpen, all soude hij daer blijven, en smacte hem een tou toe ende sloepdese bijsonder en elck alleen een groot stuck weechs. Ende berchdese allen haer lijff, vuijtgesondert een jongen. Ende zij deden haer bevaert.
