MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
319
Item het was een vrou vander Goude ende had geen geloeven in dat beeldt van Onser L. Vrouwen t’Amersfoort, datmen placht te versuecken ende meenden, wat een spaenken off gevist beelken macht mochte hebben ijemant te helpen. Des soe wert zij altehandt soe zijeck in haeren lenden, inden rugghe en beenen end int hoeft, dat zij haer nijet geroeren en mocht, men moste haer draghen, daer zij wesen soude, allroepende ende all galpende, langer dan een jaer. Doe loeffde zij te versuecken ende creech goeden vasten geloven tot Onser L. Vrouwen. Ende te handt wert zij weder gesont ende schicketede alle goede menschen daer toe, te trecken t’Onser L. Vrouwen t’Amersfoert. Ende is hier gecomen ende heeft haer bevaert gedaen ende dackte Maria. Ende haer priester ter Gou die biechte zij dat vanden ongeloven, die se daer seer in straffede ende seijde haer, hoe dat Godt zijn macht thoende in zijn heilighen, meer ter eenre steden, als tot die ander..
320
Item het was een vrou van Naerden, die een kijndt had van vij weecken, dat alzo seer schreijde, dattet schuerde. Ende dat kijndt bleeff leggende in zijnre moeders schoet all doot, datmen net anders daer aen sien off vernemen en konde, dan dattet doot was. Doe riep d’moeder Onse L. Vrou aen t’ Amersfoert, dat kijndt daer te weghen voer Onse L. Vrou mit wijn ende mit weijt. Ende altehandt soe lachtede dat kijndt zijn moeder toe ende wert all genesen.
321
Item bij Dordrecht was een vrouwe ende had een kijndt van IX jaeren, stom ende lam ende zijn voeten stonden hem al binnen voets. Ende most dat kijnt voeren op een hordewaghen, waer dattet wesen wolde. EAnde dese moeder loeffde Onse L. Vrou te versueckedn mit den kijnde ende dat kijndt voer Onse L. Vrou te brengen mit den hiordewaghen.Inden weghen, als zij was mit den kijnde, wert dat kijndt spreeckende ende doe het t’Amersfoert quam voer Onse L.vrou, doe ghijngen hem zijn voeten te recht staen. Ende dat kijndt is gesont ende machtich van hier gegaen mit zijn moeder en hebben die waghen hier gelaten.
