100051b_.html
100050b_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

328

Item dat selve vroutgen seijde, hoe dat zij een ander kijntgen, dat int water geval;len was, ende zij dat vernam, doe haelde zij dat kijndt all door vuijt den water. Ende doe zijt vuijtgehaelt had, doe en sach zij geen tijcken des levens daer aen. Ende zij loeffde Onse L. Vrou voerseijt te versuecken mitten kijnde, mochtet leven.  Ende rechtevoert begont te leven.

329

Item veel kijndeeren die verdrenckt zijn geweest, die overmits gratien van Onse L. Vrou hebben leven gechregen binnen die stadt van Amersfoert en daer buijten ende ander steden, daer men geen getall off en weet, die bijzonder all te lanck waren te schrieven.

330

Item dat was een man van Utrecht en stont mit zijn sievenen en groeff turff op Oostveen. Ende beviel onder een bonke veens en zijn gesellen groeven hem vuijt en doe lach hij voer doot. Zij loeffden haer bevaert mit hem, wollen en bervoets, voer Onse L. Vrou t’Amersfoert. Ende hij wert weder levende ende zij quamen en deden haer bevaert.

331

Item het was een knechtgens tot Enss van elff jaeren ende viel  vuijt een schuijt in die zee ende was verdrenckt. En d’buren voeren vuijt en visschendet ende brochtent die moeder. Ende zij loeffden haer bevaert tot Onse L. Vrou t’Amersfoert, ende het wert weder levende.  Ende zij quamen hier en deden haer bevaert.