100053a_.html
100052a_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

336

Item het was een kijndt te Leent bij Nijmmeghen verdroncken des Dijndeachs nae midtvasten omtrint een ure. Doe d’vader dat kijndt vonde, loeffde hij dat kijnt tot Onse L. Vrou t’Amersfoert te weghen mit wijn ende mit weijt, mit gout ende mit silver ende die naeste vaert. Ende doe wert dat kijndt levende. Des anderen daghes nae die middach heeft dat kijndt in den bedde geleden, vuijtsteeckende hier en daer zijn armen soe dat d’moeder anxt hadde, dat dat kijnt vervriesen soude, alst cranck was, hebben zij dat kijndt zijn hemde aengedaen. Doe dat kijndt dat hemde aen hadde, beerden dat kijndt, oft beseten had geweest. Ende dat duerden van naer den middich tent omtrent tien off elff uren inder nacht. Doe seijde een vroutgen van den naeburen, datmen dat hemde weder vuijt doen soude ende loven dat hemde mede te offeren. Ende in  die processie mede te gaen in linnen clederen. Doe dat d’ouders dus deden, is dat kijndt terstont rustende geworden, ende heeft geslapen, gegeten ende gedroncken. Ende heeft zijn zijn bevaert gedaen. Ende zijn ouders, als zij geloeft  hadden en schildich wearen, danckende God ende Maria.

337

Item het was een maghet van Rijswijck gevangen in die Betuwe op een slot, geheeten terLeede, als van moertbrandt. Doe zij well een maent daer geseten had in een diepe kercker ende in eenen nieuwen vasten stock , doe soutmense pijnighen. Ende brocht ene pan mit coolen ende olije om mede te pijnighen. Zij riep aen Onse L. Vrou t’Amersfoert. Ende dat vueir ende olije ghijnck drie werff vuijt, alzo dat zij d’maghet weder in slooten ende meendense des andren daghes te pijnighen. Doe sprack zij: “Ghij en sult geen wille over mij hebben.”Ende leijde haer handen driewerff op die stock ende die stock spranck driefwerff op.  Als dat die Aptman sach, wert hij schreijende ende lietse quijt om Onser L. Vrouwen wille. Ende zij heeft haer bevaert hier mit een wassen stock gedaen.