MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
352
Item het was een man van Campen, die een ionck maechdeken hadde van vijff jaeren, ende liep spielen mit die kijnderen ende viel int water, alzo dat dit vader off moeder niet en wisten, hoe lange dattet int water geweest hadde. Die moeder mistet kijndt en riep ellendeloick. Ende zij sochtet mit den buren int water. Ten laesten saghen zij een handt vant kijndt. Doe toghen zijn vuijten water. Doe waren alle zijn leden all stijff. Die moedeer loeffde dat kijndt te weghen voer Onse L. Vrou t’ Amersfoert ende te hant wert dat kijndt schreijende ende weder levendich.
353
Item het was een knecht van Emmerick van XV jaeren, die baden ghijnck in den Rijn ende quam bij een diepe colck wel X roeden diep, daer hij inne swanck. Te hant schoet hij weder op mit verveerlicken geruft ende bleeff inden gront een halff ure. Als die vrienden dat vernamen liepen zij om een schepe. Daer chregen zij hem mit een haecke op het water. Ende hij ontviel haer weder ende dreeff een stuck weghes. Daer nae over een vierdel van een ure sloegen zij hem weder achter door zijn cleder in zijn vleijssche en brochten hem int schip. Doe hij int schip was, docht den luden dat zijn hals ontwee was. Daer riepen zij aen die maghet Maria en loeffdese t’ Amersfoert te versuecken. Ende over iiij uren daer nae, sprack die knecht: “O Maria, ick dancke u, want ghij hebt mij verbeden.” Hij is corts daer nae gecoemen en dede zijn bevaert, maer hij was noch weeckelick ende cranck van verstant van verveernisse, die hij had geleden inden water.
354
Item het was een schipman van Bunschoten, die opte Suer zee quam mit een schip geladen mit turff. Daer quam hem een sturm teghen en werpt zijn schip op die zijde, alzo dat zijn turff ende all zijn have vuijt dat schip viel. Ende die een knecht lach omtrent een halff ure onder dat schip. Sich, dat schip sloech weder op die ander zijde, alzoe dat die ander opt boert vanden schepe hijnck ende dochte nijet dan mede te drencken. Des bedacht hij hem ende loeffde zijn bevaert tot Onse L. Vrouwe t’ Amersfoert, die haer beeldt inden water gevonden was. Te hant sloech dat schip wederomme mit zijn mast recht op ende het ancker viel bij hem vuijt. Ende zij knecht quam weder in zijn schip ende bleef soe sitten opten boort. Corts daer na quam een ander schip van Harderwijck, die deze inne nam, daar zij God ende Onse L. vrou off danckten ende loeffden. Ende zij deden haer bevaert, als zij geloeft hadden.
