MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
366
Item het was een kijndt van Delft van ij jaeren, dat een halff jaer seer beroert had geweest vande saech, alzo dattet seer cranck wert ende ter doot waert reijde. Die moeder heeft haer bevaert geloeft tot Onse L. Vrouwen, ende nae die tijt is dat kijndt gebetert ende van die saechghe verlost.
367
Item het was een wijff van Utrecht, die een kijndt chreech, dat zijn voeten binnens beens gewassen waren. Zij loeffde haer bevaert tot Onse L. Vrou t’ Amersfoert. Ende als zij dat geloeft had, zijn des kijndts voeten weder recht gaen staen ende goet geworden.
368
Item hier quam een man van Colln, die mit hem bracht twe brieven bezegelt dat hij Sinte Cornelis pilgrim geweest had. Hij heeft zijn bevaert tot Onse L. Vrou t’ Amersfoert geloeft. Doe chreech hij die zuket XV werven nae een. Ende alzo gerijnge als hij op die weghe was herwers, is hij van die zucket verlost ende heeftes niet meer gechregen.
369
Item het was een maghet van Emmerick, die iiij jaeren op krucken gereden had. Zij loeffde haer bevaert tot Onse L. Vrou mit ij silveren krucken te offeren. Ende zij is weder gesont geworden, ende heeft haer bevaert gedaen.
370
Item het was een man vander Goude gevangen ende in een stock gesloten, daer die vrienden gelt ombooden ende zij mochten nijet chriegen. Hij riep aen Onse l. Vrou ende loeffdese t’ Amersfoert te versoecken. Ende doe heeft hij reeschap gechregen, dat hij vuijt een veijnster quam, dat vij vadem hoech was. Ende hij is hier gecomen ende heeft zijn bevaert gedaen.
