MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
382
Item het was een cureijt vuijt Vrieslandt, die gecregen had een aposteem onder zijn harte, dat hem geen meijster dorste steecken. Ende corts daer nae wert hij beroert vander popelzie, dat hij in sijnen voeten lam wert, alzoe dat hij in X weecken nije misse en dede. Hij loeffde zijn bevaert t’ Amersfoert, hem daer laten te weghen. Ende te hant swoer dat aposteem doer zijn corte ribben ende wert van buijten geheelt. Hij heeft zijn bevaert gedaen ende liet hem weghen eens priesters misse gewaede ende binnen een ure daer nae wert hij alzo sterck, dat hij hem aen dede. Ende dede misse voor Onse L. Vrouwen beelde machtich ande gesont.
383
Item het was een vrou van Leijden, die X jaeren doeff had geweest. Haer buren gaven haer te kennen, dat zij haer bevaert t’ Amersfoert loven soude. Ende binnen iij daghen daer nae wert zij weder hoorende. Ende dede haer bevaert.
384
Item het was een vrou van Nijckercken, die stont op een schelff hoeys ende sach iiij paarden in een waghen mit turff coemen ronnen, daer haer kijnt in die wech lach van ij jaeren ende hem niet helpen mocht. Daer loeffden zij haer bevaert tot Amersfoert Onse L. vrou te versuecken en dat kijndt laten te weghen. Die paerden liepen over dat kijndt mit die waghen sonder enighe quetsijnge aenden kijnde, anders dan hem zijn rugge ende ribben blauwe waren. Ende zij is binnen iiij daghen daer nae gecoemen ende heeft haer bevaert mitten kijnd ne gedaen.
385
Item het was een maghet van Rinoij bij Asperen, die blijnt wert op S. Remigius dach. Zij dede veel medicijnen aen haer oghen, dat haer all nijet en halp. Doe loeffde zij haer bevaert tot Onse L. Vrou. Ende daer nae op den H. Karsavont is zij weder siende geworden.
