MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
385
Item het was een maghet van Rinoij bij Asperen, die blijnt wert op S. Remigius dach. Zij dede veel medicijnen aen haer oghen, dat haer all nijet en halp. Doe loeffde zij haer bevaert tot Onse L. Vrou. Ende daer nae op den H. Karsavont is zij weder siende geworden.
386
Item het was een Ridder vuijt der oorden van Prucen, gevangen inden cloester te Tijel, de gesloten was mit twe boeijen aen been ende aen hande in een toorn. Daer wert hij denckende op die grote genade Onser L. Vrouwen ende hij loeffdese t’ Amersfoert te versuecken. Te hant chreech hij een cleijn schaeffken, alzo lange als een vijnger, daer hij die boeyen opstack. Daer nae wert hij een weinich ontslaep ende in dese docht hem dat hij hoerde een soete stemme, die hem wees, hoe en waer hij graven soude doer den toorn. Hij vant een cleijn mesken, daer hij die dicke toorn mede doer stack en de brack. Aldus is hij verlost van dier vanckenisse. Ende hij is hier gecomen tot Onse L. Vrou ende heeft die cluijsters mit hem gebracht daer hij aen gesloten lach.
387
Item het was een man van Oudevercoep, die gesteecken wert after tot zijnre ruggen in ende voer weder vuijt. Ende voerts twee dootwonden, alzo dat hem dat vreijsem off liep ende hij lach dat hij niet sien noch spreecken en konde. Doe quam die priester vander kerkcken, die zijnre huijsfrou seyde, dat zij haer bevaert loven soude mit haer man tot Onse L. Vrouwe t’ Amersfoert. Hij soude mit die hulpe Goedts well gesont werden. Doe loeffdet wijff haer bevaert mitten mit iij pont wasses ende te hant wert hij swetende. Ende hij wert mede siende. Ende hij is gesont geworden, boven dat hem geen meijster lijff en gaff. Ende hij heeft zijn bevaert hier gedaen als zijn wijff beloeft had mit hem.
