100065b_.html
100064b_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

407
Item het was een gesel vuijt Westphalen, ende was gevangen bij Oldenburch van die grave van Benthem ende hij lach, daer in een hoghe diepe toorn xx weecken lanck, alzo dat daer voor hem schreeff een heer van Gelre ende den heer van Cleeff ende abdis van Elten. Ende ten halp all niet, alzo dat hij viel aen Onse L.Vrou t'Amersfoert ende hij en hadde niet daer hij hem mede behelpen mocht, dan stroeij. Daer maeckte hij off een coerde. Dat worp hij boven in dat wolft vanden toorn ende daer bij soe haelde hij hem op dat wolft. Ende nu wast noch IX vadem te veijnster vuijt te gliden. Ende hij en hadde geen touwe bij hem. Dan hij schoerde zijn hemde ende all zijn cleder en stucken ende bandt dat te samen ende alzo glede hij neder, also veer alst reijcken mocht, ende viel voert neder op die aerde, all naeckent, ende stack hem door.

408
Item int jaer van Lvj op den heijlighen Karsavont bij daghe op der zee worden gevangen twe schipmans vanden Briel en worden in Zantwijck in Engelant in die stock geleijt ende mit iij sware ijseren banden geleijt, als omden hals ende dat middel haers lijffs ende die voeten. Ende soe laghen zij tot op Meij avont inder nacht. Ende zij loeffden Onse Soete Vrouwe van mirakel t'Amersfoert, eer zij t'huijs quamen, haer bedevaert te doen. Ende terstont soe ontspronghen alle die banden ende d'stock wert loes, sonder handen off enighe instrumenten. Ende vonden iij doeren open ende oock die poorte van die stede. Ende ghijngen vrie ende los, sonder iemants lettel of hijnder. Ende hem ghijnck voer in een manier een keerslichte. Oerconde der waerheijt doe hebben dese twe  als Peter Jacobsz, Hein Gerritsz nu op Woensdaghe nae S.Servaesdach haer bedevaert volbracht te vijff uren naeder vespertijt ende d'voerseijde ijzeren banden en souden iiij mannen niet moegen dragen. Daer Godt ende Maria off gelovet moeten zijn. Amen.