MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
414
Item Anno LIX was een man omtrent van xxx jaeren, heer Jans neve van Alphen, Ridder des landts van Cleve, die wert gevangen van Jonck'Gerrit van Oldenburch. Daer sat hij iij iaer in swaere gevanckenis, noch hij en mocht om geen redelick goet, des hij machtich was, gequiteert worden. Doe dede hij zijn gebet met ganser betrouwen tot Onser L.Vrou. Des nachts nae quam hem in zijnen visioen te voeren, dat hij zijn bevaert t'Amersfoert doen solde in eer Onser L.Vrouwen mit sijnre offerhande. Inder naester nacht, als hij die gelofft had gedaen, ontsprongen alle ijseren banden ende sloten ende dooren des gevanckenis. Ende quam t'Amersfoert ende dede zijn bevaert ende betaelde zijn gelofte mit een wasschen toorn.
415
Item het waren ij mannen mit een schip in die zee ende was een sturm. Ende het schip creech een groet gat, also dat zij dat schip vol waters chregen ende zij drie daghen en drie nachten in grote anxt en sorghe waren ende anders niet en wisten dan zij souden verdrencken, alzo dat zij aenroepende waren die ghebenedide Moeder ende Maghet Maria ende loeffden haer te versuecken tot Amersfoert en voor haer beelde laten te sijnghen een misse tot Haerre eeren. Ende terstont als zij dat geloeft hadden sijnt zij verlosset vanden water ende sijnt te lande gecomen gesont en vrij van alle schaden. Ende zijnt hier gecomen des Woensdaechs voer Pinxteren ende hebben haer bevaert gedaen.
416
Item het was een wijff van Steenwijck ende was iiij jaeren all blijnt. Ende zy wert denckende op Onse L.Vrou, wat teijkenen ende mirakelen zij dede doer dat beeldt t'Amersfoert. Ende zij loeffde haer bevaert, Ende zij wert siende. Ende quam hier en dede haer bevaert anno LX.
