MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
416
Item het was een wijff van Steenwijck ende was iiij jaeren all blijnt. Ende zy wert denckende op Onse L.Vrou, wat teijkenen ende mirakelen zij dede doer dat beeldt t'Amersfoert. Ende zij loeffde haer bevaert, Ende zij wert siende. Ende quam hier en dede haer bevaert anno LX.
417
Item het was een wijff van Naeltwijck ende was swaer beladen mitten water. Ende zij ghijnck te raden mit die meijsters off zij haer ijet te helpen coemen mochten. Ende die meijsters gaven haer geen goeden troest. Ende die een seijde: zij mochtet noch onthouden vijff off ses weecken lanck. Ende d'ander seijde, sou zijt onthouden tent Meij, dat waer goet, maer niet langer mocht zijt onthouden. Ende zij sochte troest ende hulpe aen die maghet Maria ende liet die meijsters varen. Ende loeffde haer bevaert t'Amersfoert voer dat beeldt dat inden water gevonden is. Ende doe zij dat gedaen hadde, wert zij all dat water quijt in iij daghen. Ende zij quam hier en dede haer bevaert, ende loeffde ende danckte die Maghet Maria.
418
Item het was een wijff van Campen anno Lxj, die haer handt geswollen was, daer zij sulcke pijn aen had dat haer dochte, dat zij bijster haerre sinnen werden soude van grooter 418 pijnen. Ende sommighen meijsters seijden, dat zij haer handt verliesen soude. Ende zij badt die Maghet Maria, dat zij haer sinnen behouden mocht ende loeffde t'eere Maria een wasschen handt te offeren t'Amersfoert ende terstont wert zij verlost vanden pijn.
