MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
421
Item het was een man van Loechum, die mitter popelzije seer geslagen was, alzo dat hem zijn mont bij nae aen zijn ooren gespannen was. Also dat hij loeffde Onse L.Vrou te versuecken mit een wasschen hoeft. Ende nae die beloften, binnen vier uren, wert hij weder gesont. Ende heeft zijn bevaert gedaen voer Onse L.Vrou, haer danckende, omtrent S.Bonifaes dach.
422
Item het was een wijff van Haerlem, die ij loopende zeeren had, daer zij Sint Adriaen ende Sint Quirijn mede versocht hadde, maer in haerre zeericheijt gebleven was. Waerom dat zij loften dede t'Amersfoert Onse L.Vrouwe te versuecken ende cort nae dijen tijden heeft zij genade verworven. Ende heeft haer bevaert gedaen mit een wasschen beelde van een pont wasch, danckende Onse L.Vrouwe omtrent S.Bonifaes dach.
423
Item het quam een man vuijt Brabant, ende woude zijn bedevaert t'Amersfoert Onser L.Vrouwen doen. Ende inden wech off reijse t'Onser L.Vrou wert, moetende hem vier gebroederen, welcke broederen haerre vader offgeslagen was vanden vader des mans voerseijt. Ende die iiij gebroederen chregen kennisse des voerseijden mans, als dat hij dat naeste bloeit was tot den geenen, die haer vader geslegen had. Ende omghijngen hem mit wapenen om haeren vader aen hem te vreecken. Ende seijden:"Nu zijt ghij op die stede, daer ghij sterven sult; want u vader heeft onse vader geslagen". Ende dese man, zeer beanxt, is achterwaerts getreden en geweecken aen eenen boem, daer hij zijn betrouwen alleen in die Moeder der Bermharticheijt geset heeft, mit opreckende handen aldus spreeckende:"O Maria, ghij weet, dat ick in weghe ben U te versuecken. Wilt aen mij nu thoenen u barmharticheijt, op dat ick u versuecken mach. Ick wil u pilgrim bliven iaerlicxs u versueckende buijten noetsaecken, de daghe mijns levens, in linne cleder."Ende Onse L.Vrou heeft hem bedeckt van den oghen ende gesicht deser vier broederen, dat zij hem niet en konden sien, daer hij voer haer stont aen den boem, um deser voerseijden loften t'Onser L.Vrouwen. Ende hebben gevloeickt, vermalediende den man, niet weetende , waer hij gebleven was. Ende als zij hem niet vijnden noch sien en konden, sijnt zij van dier steden gegaen, hem soeckende. Ende dese man is mit groter devotien t'Amersfoert gecomen in die vaert Onser Liever Vrouwen ende heeft dit minlicken elckman vertelt, alzo dat van devocie ende compunctie mennich mensch weenden, doende en betalende die H.Maghet Maria zijn belofte ende bedevaert anno Lxj i festo ambit.beat. Virginis Mariae.
