MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
474
Item het was een knecht geslagen vanden donre in zijn ouders huijs, woenachtich bij Leewerden, op S. Jan Baptisra dach, die doot lach bet dan een halff ure. Ende zijn ouderen loeffden Onse L. Vrouwe te versuecken ende hij ontworp. En zij hebben haer loften betaelt.
475
Item te Mastebroeck bij Campen was een vrou seer zieck, also dat die geenen, die daer bij waren, verwachtende haer vuijtganck. Inder nachten te tien uren soe verscheijden zij, alsoe dat zij anders niet en wisten, die daer bij waren, sonder sacramenten. Doe wert haer dochter seer weenende ende loeffde haer bevaert tot Onser L. Vrouwen, mit haer moeder, t'Amersfoert te versuecken. Ende terstont ontwerpt zij weder. Ende zij hebben haer bedevaert gedaen.
476
Item te Oosterhout was een knechtgen ende soude een koet vol loets geeten.Ende doen dat loet gesmolten was, doe docht hem, dat hij niet genoech hebben soude. Ende hij sochte meer loets. Ende hij en vant niet meer, dan een teijken van Onse L. Vrou t'Amersfoert. Ende dit smelten hij daer toe ende als het gesmelten was, soe goeijt hij dat ende dat daer beseijden liep wert weder een teijken Obnser L. Vrouwen.
477
Item bij Amerongen quam een waghen vol volcxs varen op een breeden wech. Ende daer was een modderighe sloet bij. Ende die waghen is omgevallen ende dat volck is in die sloet gevallen. Item toe sijn zij weder vuijtgecomen ende hebben haer waghen toegemaeckt ende zijnt een stuk weechs van daer gevaren. Item toe hebben zij onder malcander gemist een knechtgen van xiiij iaeren. Ende dat was in die modder blieven steecken, soe dat ment niet gesien en konde. Ende soe zijn zij haestelick wederomme gelopen ende hebben dat kijndt gesocht. Ende zij hebbent in die sloet gevonden en hebbent doot vuijtgetoghen. Ende hebben haer bevaert mit dat kijndt geloeft t'Onser L. Vrouwen t'Amersfoert ende voer Onse L. Vrou laten te weghen ende terstont als zij haer bedevaert geloefft hadden, soe is dat kijndt levendich geworden. Anno Lxxxxiij.
