100080a_.html
100079a_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

481

Item bijder Gouwe was een clerck, die van den geenen, daer hij mede gijnck, vermoedelick, tussen een derp geheeten Stolwijck ende die stadt vander Gouwe, van achteren in sijn hals geslagen wert, alsoe dat  hij verloren heeft dat dardendeel  binnen  van zijn hals, want die grote zene in die nack ende die grote zene, die daer streckt inden hals, gesneden waren vuijt, welcke slagijn bloedijnghe hij heel in onmacht geworden is. Waerom hij aengeroepen heeft Mariam die Moeder Goedts om sterckheijt ende bijstant. Ende heeft geloeft ter eeren van haer, waert saeck dat hij levendich ter Gouwe mochte coemen ende heelen, dat hij haer t'Amersfoert soude versuecken. Ende aldus is hij opgestaen ende doer verdiensten Mariae en haer lieve Zoon volcoemelick geheelt.

482
Item int jaer van  Lxxxv doe verdorff een schip voer der Sluijs ende daer waren IX mannen ende daer verdrencter iij off ende die ander ses hebben Onser L. Vrou aengeroepen t'Amersfoert te versuecken. Ende zij heeftse te lande geholpen.

483
Item dat was een man van Schevenijnghen, ende sat gevangen te Diepen in Vranckrijck ses iaer lanck. Ende sat in sware boeijen gesloten in een duijster kelre, die mit iij dueren all vast gesloten was. Dese man heeft aengeroepen Onse L. Vrou t'Amersfoert ende heeft zijn bevaert geloeft. Ende terstont, als hij zijn bevaert geloeft hadde, soe is daer Onse L. Vrou gecomen mit veel ioncfrouwen ende mit een schoen claerheijt ende terstont is die boeij off gevallen ende die doeren heeft hij open gevonden. Ende terstont als hij daer was, zijntse bij hem  selven toegegaen. Dit heeft die man geseijt, dat het aldus geschiet is naer S. Jacobsdach Anno Lxxxv.

484
Item daer was een man van Leijen, ende was vuijter maeten seer geschoert ende leedt alte grote pijn iij jaeren lanck  ende sonderlijnghe alt onweren wolde. Dese man heeft zijn bevaert geloeft tot Onse L. Vrou t'Amersfoert. Ende gij is terstont gesont geworden. Anno Lxxxv.