100081b_.html
100080b_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

489
Item te Delft was een kijndt van dardalff iaer ende had groet gebreck vanden steen, also dattet lach viij daghen lanck, datmen meenden, dat het sterven soude. Die moeder wert denckende op die ghenade Onser L. Vrouwen t'Amersfoert ende heeft haer bedevaert geloeft ende dat kijnt laten te weghen mit wijn ende weijt, mit gout ende silver. Ende terstont is hem die steen offgegaen doer zijn manlickheijt. Ende zij is gecomen mitten kijnde ende heeft haer belofte voldaen Swoendachs nae H. Sacranentsdach anni Lxxxvij.

490
Item bij den Brijel was een molenaer malende op die moelen. Ende daer quamt hem, overmits donre ende blixem, dat hij blijnt wert, also dat zij hem vanden moelen brengen mosten ende also leggende blijnt langer als iiij uren, wert hij ten lesten denckende  op die genaden Onser L. Vrou t'Amersfoert ende loeffde  Onse L. Vrou daer te versuecken. Ende terstont is hij siende geworden. Ende is gecomen des Woensdaechs voer S, Jacob en heeft zijn bedevaert gedaen anno Domini nostri Lxxxvij.

491
Item het was een man van Amsterdam, die gevangen sat te Diepen in Vranckrijck in een huijs op een hoghe solre in swaren vanghenisse ende mit swaren ijseren banden gesloten. In die swaren last wesende, loeffde hij Onse L. Vrouwe te versuecken mit een wassen man als hij gesloten was, om troest te verchriegen. Ende doe overmits hulpe Onser L. Vrou snee hij mit een cleijn mesken een vijnger lang die banden ontwee ende  reet mit een slaeplaecken vuijt den veijnster ende quam in een ander huijs all omme vast toegemaeckt. Ende daer lange tijt oock in wesende ende daer  nae vuijtquam overmits t'mirakel is oock over die stadtsmuer gereden ende op den dach coemende, wert hij gesocht van zijn vijanden, die hij wel sach ende zij saghen hem niet, want hij achter een doerne bosken lach. Ende aldus quijt coemende is hier gecomen ende heeft zijn bevaert gedaen anno Lxxxvij.