MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
495
Item aen gheen zijde Mens was een man gesteecken in zijn selffs huijs, als boven in zijn scholderen tot beneden zijn gemacht weder vuijt. Ende lach voor doot ses uren lanck, ende als men hem int vat leggen soude, doe wert die ander man, die daer op den kerckhoff was om vreese zijns lijffs, denckende op die mirakelen ende barmharticheijt, die God doer Onse L. Vrou t'Amersfoert dede en loeffde Onse L. Vrouwe te versuecken. Ende terstont doe hij dat loeffde, wert hij weder levendich ende seer bloeijende. Ende zijn huisfrou is gecomen en heeft die bevaert gedaen, also alst haer man geloeft had, want hij selfs doer dat landt niet wel en trecken dorst. Ende zij is gecomen en heeft die bevaert gedaen op S. Peter en S.Pouwels dach Anno Lxxxix.
496
Item te Arnhem was een vrou en soude des avonts vuijt haer huijs gean. Ende int vuijtgaen sach zij also veel duvels, dattet ontelleick was, dat zij also seer verveert was, dat zij drie daghen lach als een beseten ende rasende mensch, datmen daer groot iamer aen sach ende geen troest en vernam. Doe loeffde haer moeder voer haer, dat zij Onse L. vrou tot Amersfoert souyde versuecken. Terstont quam zij weder tot haer selven ende doe haelde haer vader een observant om haer te troesten. Ende doe broeder brocht haer soe veer, dat zij haer biecht dede ende hem meinisch wonder dinge seijde in die biecht wat haer beiedende ende gesien mede had, dat hij niet seggen en mocht. Ende zij is selver gecomen ende heeft haer bevaert gedaen, als haer moeder geloeft had. Anno Domini MCCCCLXXXIX daechs voor Sint Martijns avont.
497
Item op Onse L. Vrouwen dach midden oost geschieden dat een oosterschip quam zeijlen vuijt Zeelant onder Engerlandt. Ende overmits onweerder ende tempeest quamen zij zeijlen op Kreijenbanck ende dat schip begost daer te kraecken ende te schueren, alzo dat zij waren in groter anxt haers llijffs, want zij geen troest en saghen, die doot te ontgaen. Ende daer bevalen zij God ende zijn lieve heijlighen zijell ende lijff. Ende daer waren in dat schip omtrent vijftich personen, onder welcken een van Deventer genoemt Jan van Essen. Die seijde, dat zij aenroepen souden Onse L. t’Amersfoert, die welck inden water gevonden was ende grote mirakelen doot ont water, op dat zij ons bijstaen wil. Ende doe ruiepen zij gemeenlick Onse L. Vrou aen om verlost te worden. Ende die zij terstont geen troest en vernamen, toe seijde een onder hem: “wij moeten een trouwe pilgrom vuijtmaecken, die haer versoecktet voer ons allen mit een trouwe offerhande. Ende daer loeffden zij mit malcander Onse L. Vrou een silver schip te geven. Ende terstont doe zij dat geloeft hadden, heffede hem dat schip op sonder enighe sonderlijnge wijnde een grote cubijt te rugge in dat diepte ende zij zijnt gesont te lande gecomen. Ende Jan van Essen heeft die offerhande ende dat silveren schip voor Onse l. Vrou gebrocht anno Domini MCCCCXC.
