MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
515
Item Meijster Lodewijck Jager was te Schoenhoven gevangen ende wert inden Haghe gevuert, ende in sware gevanckenisse geleijt, alsoe dat hij well hondert pont ijsers aen handen ende voeten had. Ende in dese sware gevanckenis wesende, loefde hij God ende Onse L.Vrou t'Amersfoert zijn bevaert ende een beelde te offeren van een halff pont silvers. Also vroech als hij dat geloeft had, soe wert hij ontslaep ende doe docht hem, dat Onse L.Vrou tot hem quam ende het wert alzo licht in die kelre,daer hij sat, dat hij daer off ontwaecte ende doe viel hem dat ijser van handen ende voeten ende stont vrij op zijn voeten. Ende toe tasten hij aen die duere, die van buijten gesloten was mit ij slooten ende die ghijnck tegen hem op. Doe most hij noch gaen door die koecken ende daer saten twe maechden en sliepen ende in die zael saten veel heeren en aten. Daer ghijnck hij verbij, dat hem niemant en sach mit hulp van Onse L.Vrouwe.
516
Item het was een vrou te Tijel ende wort geslagen van die donre ter aerden in haer huijs, dat daer die mont ende kinnebacken all slim stont, ende lach daer voor doot, dat die buren daer groot iamer aen saghen ende seijden, dat zij haer bevaert loven soude voer Onse L.Vrou t'Amersfoert. Ende doe zij dat gedaen hadden, terstont genas zij. Ende zij is gecomen ende heeft haer bevaert gedaen in die hoeij maent Anno Domini nostri Mxxxx xciij.
517
Item het was een knechtgen bij Amersfoert in die Hoeff, en was verdrenct in een kolck. Ende die had bij hem zijn susterken en een buerknechtgen ende die riepen ende hueilden. Ende dat meisken liep te huijs en sout zijn moeder zeggen ende eer die moeder quam, overmits dat geruft, soe hadden die buren vuijtgetoghen ende lietent voor doot leggen mit die voet int water. Ende doe die moeder quam ende sach soe haer kijndt leggen doot also onversienlick, soe riep zij God aen ende Onse L.Vrou t'Amersfoert te versuecken en terstont ontworp dat kijndt. Ende dit geschiede op den asschele Woensdach Anno Domini Mcccc xciiij.
