MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
517
Item het was een knechtgen bij Amersfoert in die Hoeff, en was verdrenct in een kolck. Ende die had bij hem zijn susterken en een buerknechtgen ende die riepen ende hueilden. Ende dat meisken liep te huijs en sout zijn moeder zeggen ende eer die moeder quam, overmits dat geruft, soe hadden die buren vuijtgetoghen ende lietent voor doot leggen mit die voet int water. Ende doe die moeder quam ende sach soe haer kijndt leggen doot also onversienlick, soe riep zij God aen ende Onse L.Vrou t'Amersfoert te versuecken en terstont ontworp dat kijndt. Ende dit geschiede op den asschele Woensdach Anno Domini Mcccc xciiij.
518
Item inden tijden dat die hartich van Sassen quam in Haerlem, om dat volck van kees en broodt, also genoemt, onder die voet te houden, want daer mede een grote partie op stont. Alsoe wort daer een huijs gespolieert, daer die vrou haer verstant inne verloer ende bijster haerre sinnen wert. Ende in die raserie wesende had zij sonderlijnghe manieren, als dat zij geen goet weeder lieden en mocht ende dat die luden aten off wel gecleet ghijngen ende meer gemeenlicke manieren. Also datmen dar groet iamer aen saecht, ende dit duerde wel ij jaer off langer. Ende in dese grote iamer wesende, hebbende die vrienden God ende Onse L.Vrou haer bedevaert geloeft t'Amersfoert ende haer daer laten te weghen. Ende zij is Donredaechs voer S.Jans dach middesoemer gecomen en heeft haer bevaert gedaen ende is gesont wederom gereijst. Anno Mcccc xciiij
519
Item te Oudekercken in Holland was een kijndt verdrenct ende lach daer lange voor doot, datter veel luden bij quamen ende beclaechden dattet soe zijn leven gelaten hadde ende zij geen troest en saghen.Doe loeffden die ouders ende geburen Onse L.Vrou t'Amersfoert mitten kijnde te versuecken, ende terstont is dat kijndt levendich geworden. Ende zij zijn gecomen en hebben den kijnde in een mande gedraghen ende hebben haer bedevaert gedaen Anno Mcccc xcv.
