100089a_.html
100088a_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

519
Item te Oudekercken in Holland was een kijndt verdrenct ende lach daer lange voor doot, datter veel luden bij quamen ende beclaechden dattet soe zijn leven gelaten hadde ende zij geen troest en saghen.Doe loeffden die ouders ende geburen Onse L.Vrou t'Amersfoert mitten kijnde te versuecken, ende terstont is dat kijndt levendich geworden. Ende zij zijn gecomen en hebben den kijnde in een mande gedraghen ende hebben haer bedevaert gedaen Anno Mcccc xcv.

520
Item te Rotterdam was een kijndt verdrenct ende die ouders loeffden Onse L.Vrou t'Amersfoert te versuecken om dat kijndt levendich te worden. Ende doe zij dat gedaen hadden, ontspranck dat kijndt. Ende die ouders hebben haer bedevaert gedaen Anno Domini Mcccc xcv.

521
Item het was een man ende sat gevangen in Boemel ende mit zijn handen ende beenen gesloten in sware banden mit noch een man. En doe hij geen troost en sach, doe loeffde hij zijn bevaert t'Amersfoert voor Onse L.Vrou. Ende die ander man docht, het soude van geender weerden wesen. Maer doe hij zijn bevaert loeffden, ontsprongen die sloten ende hij heefter een t'Amersfoert voer Onse L.Vrou gebrocht ende zijn bevaert gedaen Anno Mcccc xcv.

522
Item het was een vrouken te Haerlem ende was beseten van die viandt. Ende die vrienden hebben haer gebrocht voor Onse L.Vrouwe in die vaert en daer heeftse groot gebeer en geruchte gemaeckt, dat die gemeen pilgrommen groot iamer aen haer saghen. Ende zij is gevallen in onmacht ende daer inne verlost ende gesont opgestaen. Anno Mcccc xcv.