100091a_.html
100090a_.html

FACSIMILE


MIRAKELBOECK

ONSER LIEVER VROUWEN

‘T AMERSFOERT

Uitgave ‘Het Onze Lieve Vrouwe Gilde”

Amersfoort 1946

530

Item het was een maecht van Kraenenborch, die was gevallen van haer balck ende hadde haer soe seer gedaen aen haar been, soe zij op een becken gevallen was, dat allman meende, dat zij daer aen sterven soude, want dat been soe seer gequest ende gewonde was. Ende mit groter betrouwen ende devotien, die zij hadde tot Onse L. Vrouwe, soe heeft zij haer bevaert geloeft t’Amersfoert voor Onse L.  Vrouwe ende is gecomen, noch open wonden hebbend aen haer been, iegens haer vrienden danck gaende ende heeft haer bevaert gedaen ende is gesont geworden. Anno Domini Mccccc.

531

Item het was een man ter Goude in Hollandt ende had een kijndt dat dardalff iaer out was. Ende is gevallen in een water schoeit mit zijn hooft in die gront, de modderich was. Ende een lange wijel daer nae, soe is daer een vrou gecomen om haer clederen vuijt te wasschen ende als die vrouwe gedaen had, soe sach zij op dat water drieven, off daer een out cleet opgedreven had. Zij heeft genomen een stock ende woude dat cleet aen landt halen ende doe zij dat aen landt gechregen hadde, soe sach zij, dattet een kijndt was ende zij en wist niet, hoe lange dattet daer inne gelegen hadde. Soe heeft zij daer meer luden bij gehaelt, die dit gesien hebben mit die ouders. Ende zij hebben aengerroepen God ende Onse L. Vrouwe ende hebben geloeft Onse L. Vrouwe t’Amersfoort te versuecken. En dat kijndt is wederomme levende geworden.