MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
533
Item het was een schipman, die quam zeijlen mit zijn schip onder Engelandt. Ende daer is opgestaan een onweeder ende sturme, soe dat zij dat zeijl niet striecken en konden ende achter vuijt dat schip is geborsten een groot hout, also dat zij waren in grote anxt haers lijffs, soe dat zij die doot voor haer oghen saghen ende hadden geenen troest die doot te ontgaen, soe is die schipper denckende geworden op die grote genade die daer daechgelicxs geschiet t’Amersfoert door bede van Onser L. Vrouwen. Ende hij heeft aengroepen God ende Onse L. Vrou ende heeft geloeft te versuecken Onse L. Vrouwen beeldt t’Amersfoert mit een keersse van vijff pont wasch. Ende terstont soe is die wijnt gaen leggen ende dat onweder is vergaan ende zij sijnt dat schippe gesont aent landt gecomen. Endie die schipper is gecomen t’Amersfoert en heeft zijn bevaert gedaen en heeft zijn offerhande gebrocht voor Onse L. Vrou, als hij geloeft hadde, op den viij dach in die Meij Anno M.D.iiij.
534
Item het was een vrou bij Leijden in Hollant ende ghijnck groff van ij kijnder. Deze vrouwe heeft gechregen in haer lijff venijnt, edat zij also dicke begost te swellen, dat alle die geenen die haer saghen, die seijden, zij most barsten. Soe sijnt haer vrieden gelopen tottet Doctoren der medicinen om raedt aen hem te nemen. Die seijde: “Men weet haer niet te helpen, zij moet barsten.”Ende als zij geen troost en vonden aen die menschen, soe heeft zij aengeroepen God ende Onse L. Vrouwe ende heeft geloeft dat beeldt van Onse L. Vrouwe t’ Amersfoert te versuecken ende daer haer te laten weghen. Ende terstont soe is zij verlost van dat venijnt ende heeft gechregen twe kijnderen. Ende zij is gecomen in die vaert tot Amersfoert ende heeft ghaer bevaert gedaen. Anno M.D ende iiij.
