MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
4
Item noch op den selven dach wasser een vrou van Utrecht, die twe iaer lanck hoeftsweerijnghe gehadt had. Zij loeffde haer bedevaert tot Onser L. Vrouwen ende zij wert gesont.
5
Item des sonnendaechs hier nae wasser een vrouwe van Utrecht, die had een kijnt van ij iaeren, dat alzo groet gebreck vanden water hadde, alzoe dat zijn buijck all swert geworden was ende die ouders meenden, dat daer geen leven in en waer. Zij loeffden dat kijnt te weghen mit wijn ende mit weijt ende dat kijndt wert wederomme gesont.
6
Item het was een vrou van Campen, die groet gebreck vanden water hadde. Zij loeffde haer bedevaert hier ende zij wert gesont.
7
Item het was een vrou van Utrecht, die iiij iaer die hoeftsweerijnghe gehadt hadde. Zij hoerden seggen van d’groete genade die Onse L. Vrou hier thoende. Zij loeffde haer bedevaert ende zij wert gesont.
8
Item het was een knecht van Hoorn, die vercroepelt was in sijn been, daer hij alzoe groete stichte aen had, dat hij nerghens mochte duren. Hij loeffde zijn bedevaert ende wert weder gaende.
9
Item het was een vrou van Utrecht, die in een halff iaer niet van den bedde bij haer selven conde coemen, dan datmense op ende neder moste draghen. Zij loeffde haer bevaert hier tot Onser L. Vrouwen ende zij is gesont geworden.
10
Item het was een man van Utrecht, die zoe groet gebreck had vanden steen, dat hij iij weecken lanck lach, dat hem dochte daer aen te sterven, alzoe dat hij mit zijnen vrienden hem selven overgaff om laeten te snieden. Ende d’meijster quam daer, dan en conde die steen niet vijnden, alzoe dat d’meijster thuijs ghijnck. Terstont quam hem in zijnen sinne van Onser L. Vrouwen genade t’Amersfoert. Hij loeffde zijn bevaert ende binnen een ure daer nae heeft hij den steen vernomen, daer hij off verlost is. Ende is hier gecomen mit d’steen ende heeft zijn bevaert gedaen.
