MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
13
Item het was een kijndt op die Bildt, dat verdrenct was. Die ouders vonden t’kijndt inden water, dat zij brochten ten vrouwen cloester voor dat beeldt Onser L. Vrouwen, dan halp hem niet. Doe wasser een die hun seijde vande groete ghenaden die daechgelicxs geschieden t’Amersfoert tot Onser L. Vrou. Die ouders loefden haer bedevaert daer ende te weghen t’kijndt mit wijn ende weijt. Ende thant ist kijndt levendich geworden, dat doe iij uren lanck doot geweest hadde.
14
Item het was een maghet van Thijel van xiij iaeren. Deze ghinck op haers vaders solre ende schoet tusschen ij plancken doer wel xxiiij trappen nederwaerts, alzoe dat zij niet roeren en mocht aen all haer lijff. Ende over iij uren hier nae soe quam daer een, die van Onser L. Vrouwen ghenade seijde, die t’Amersfoert geschiede. Ende d’vader loeffde zijn bevaert ende die dochter te weghen mit wijn ende weijt. En terstont wert zij wederomme gesont.
15
Item tot Amsterdam was een priester gevangen van d’provisoer. Dese wert geslooten op een camer in een boeije. Daer wort hem geseijt van Onser L. Vrouwen ghenade t’Amersfoert. Hij loeffde zijn bedevaert ende rechtevoert vant hij een spelde bij hem leggende welcke spelde hij nam ende stackse in dat slot. Te hant spranck dat slot op. Doe dochte hij in hem selven: ick en wil niemant in last brenghen van die mij bewaeren ende hij sloet hem selven weder. Ende die ghenen die hem bewaerden, gaff hij te kennen, dat hij wel vuijt coemen conde, wanneer hij woude, dat zij niet en geloeffden. Doe nam hij anderwerff d’spelde ende stackse int slot ende het ghinck weder op. Doe ghijngen zij tot haer oeverste ende seyden hem, wat deze priester geschiet waer, doe hij zijn bevaert geloeft hadde. Ende zij lieten hem gaen. Ende hij is hier gecoemen ende heeft het selver openbaerlick gekundicht, wat hem geschijet was.
