MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
15
Item tot Amsterdam was een priester gevangen van d’provisoer. Dese wert geslooten op een camer in een boeije. Daer wort hem geseijt van Onser L. Vrouwen ghenade t’Amersfoert. Hij loeffde zijn bedevaert ende rechtevoert vant hij een spelde bij hem leggende welcke spelde hij nam ende stackse in dat slot. Te hant spranck dat slot op. Doe dochte hij in hem selven: ick en wil niemant in last brenghen van die mij bewaeren ende hij sloet hem selven weder. Ende die ghenen die hem bewaerden, gaff hij te kennen, dat hij wel vuijt coemen conde, wanneer hij woude, dat zij niet en geloeffden. Doe nam hij anderwerff d’spelde ende stackse int slot ende het ghinck weder op. Doe ghijngen zij tot haer oeverste ende seyden hem, wat deze priester geschiet waer, doe hij zijn bevaert geloeft hadde. Ende zij lieten hem gaen. Ende hij is hier gecoemen ende heeft het selver openbaerlick gekundicht, wat hem geschijet was.
16
Item het was een man van Medemblijck, die een iaer lanck lam was. Hij loefde zijn bevaert ende hij wert gesont.
17
Item het was een wijff van Utrecht, die ij iaer die hoeftsweeringhe gehadt had. Zij loeffde haer bedevaert en zij is gesont geworden.
18
Item het was een wijff van Utrecht, die haer adem qualicken chriegen conde. Zij loefde haer bevaert ende wert gesont.
19
Item het was een man van Nijmmegen, d’niet wel hooren conde. Hij heeft zijn bedevaert geloeft in een hemde ende wollen en bervoets. Ende terstont is hem dat hooren gebetert.
20
Item het was een kijndt bijder Elburch, dat alzoe groot gebreck had aen d’steen, dattet van des morgens te vijff uren tot des middernachts zijn water niet maecken en conde. Die vader loefde zijn bevaert Onse L. Vrou hier te versoecken mitten kijnde. Ende doe nam hijt op ende leijdet op een kussen ende nam zijn manlickheijt in zijn handt. Rechtevoert is die steen vuytgecoemen ende is gesont geworden. Ende d’vader bracht d’steen mit hem hier.
21
Item was het een kijndt van Utrecht, dat alzoe groet gebreck aent water had, dat zijn buijck all swart geworden was, alzoe dat d’ouders daer groet iamer aen saghen. Zij hebben haer geloeft mit den kijnde en terstont is hem dat water geloest ende is genesen.
