MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
32
Item het was een man van Nijmmeghen, die een steenhouwer was, ende had een paeile in zijn een ooghe. Dese man sat en soude een mostert moelen houwen, alzoe dat hem een stuck van d’steen in zijn ander oghe spranck, dat hij een wijel tijts blijnt was. Ende die meijsters en wisten hem geen raedt te geven. Doe hoerde hij seggen van Onse L. Vrouwen genade t’Amersfoert. Hij loeffde zijn bevaert ende hij wert weder siende.
33
Item het was een wijff van Oudebroeck, die alte sware zuket gehadt hadde meinich iaer. Ende d’zucket plach haer aen te coemen mit groeter koude iij ofte iiij daghen lanck, dat zij nergens wiste te blieven. Ende alsdan toech d ‘zucket in haer beenen, dat zij langhe tijt lach, dat zij niet en conde gaen. Zij loeffde haer bevaert tot Onse L.Vrouwen ende ghinck van huijs tot dat zij quam bij Gerrit van Putten bij Harderwijck. Daer bestont haer d ‘zucket swaerlicken aen te coemen. Ende is voert gecoemen voer Onser L. Vrouwen beelde ende heeft haer gebet gesproecken ende is aldaer gesont geworden.
34
Item op den selven dach soe heeft dat wijff een bijster kijndt mit haer gehadt van xij iaeren, dat hadde een hoeft alzoe seer, dattet niemant geheelen en conde. Die ouders loeffden haer bevaert mitten kijnde tot Onse L. Vrouwen ende dat kijnt wert gesont. Ende dede zijn bevaert mit desen voersijde vrouwe.
35
Item het was een maghet van Deventer, die gevallen had xxxij voeten hoech door iij luken. Ende viel voert op een harde steen haer arm ontwee ende haer hoeft ontwe. Ende zij lach IX weecken sonder te spreecken. Ende indien zij dus lach, zoe wert zij denckende aen Onse L. Vrou d’inden water gevonden was. Zij loefde haer bedevaert ende quam en dede haer offerhande. Ende zij wert gesont.
