MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
35
Item het was een maghet van Deventer, die gevallen had xxxij voeten hoech door iij luken. Ende viel voert op een harde steen haer arm ontwee ende haer hoeft ontwe. Ende zij lach IX weecken sonder te spreecken. Ende indien zij dus lach, zoe wert zij denckende aen Onse L. Vrou d’inden water gevonden was. Zij loefde haer bedevaert ende quam en dede haer offerhande. Ende zij wert gesont.
36
Item het was een man van Amsterdam, die lach iij weecken int gasthuijs min iij daghen. Hij loeffde zijn bevaert t ‘Amersfoert tot Onse L.Vrou ende hij quam en dede zijn bevaert ende liet zijn krucken hier. Ende wert gesont.
37
Item het was een man van Culenburch, die belast was mitten water. Ende hij loeffde zijn bevaert ten heijligen bloede ende dat en halp hem nijet. Doe loeffde hij zijn bevaert t’Amersfoert voer Onse L. Vrou ende hij wert gesont. Ende dede zijn bevaert.
38
Item het was een man van Olst, die had xij weecken blijnt geweest. Hij loeffde zijn bevaert ende hij wert wederomme siende.
39
Item het was een wijff van Goeijlandt d’een blijnt kijndt had. Zij loeffde haer bevaert ende twert siende.
40
Item het was een man vander Goude, die op een palmdach mit zijn schip lach onder Vlaenderen, daer hem bestoecte een groete sturm ende onweder, dat hij zijn ancker vuijt worp. Ende die sturm d’wert soe groet, dat zij all meenden schipbrueckich geworden te hebben, want het ancker mede ginck. Daer riepen zij aen Onse L. Vrou, die haer beeldt t’Amersfoert inden water gevonden is. Ende die schipper loefde selver zijn bedevaert daer te doen, ende te hant bleeff dat schippe staende. Ende dat onweder verghinck.
