MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
40
Item het was een man vander Goude, die op een palmdach mit zijn schip lach onder Vlaenderen, daer hem bestoecte een groete sturm ende onweder, dat hij zijn ancker vuijt worp. Ende die sturm d’wert soe groet, dat zij all meenden schipbrueckich geworden te hebben, want het ancker mede ginck. Daer riepen zij aen Onse L. Vrou, die haer beeldt t’Amersfoert inden water gevonden is. Ende die schipper loefde selver zijn bedevaert daer te doen, ende te hant bleeff dat schippe staende. Ende dat onweder verghinck.
41
Item het was een wijff van Campen, dien haer mont ende haer haer oghe all slim getogen was, op Onser L. Vrouwen conceptionisdach. Zij loeffde haer bevaert tot Onse L. Vrouwe ende zij wert weder wel te pas.
42
Item het was een knecht vuijt Hollandt, die zijeck was ende hadde Sinte Quijrijns zucket aen zijn been ende dat ander been was hem opgecrompen. Hij meijsterde iij iear daer over ende ten halp hem nijet. Doe loeffde hij zijn bevaert ende hij wert gesont ende zijn krucken liet hij voer Onse Lieve Vrouwe.
43
Item een man quam t’Amersfoert mit iij gesellen ende woude gaen tot Harderwijck. Zijn gesellen seijden hem: “Laet ons eerst Onse L. Vrou versoecken, eer wij vuijt Amersfoert scheijden.” Hij antwoorde: ”Ick kanse nu niet versoecken, want ick wil thuijs.” Die gesellen deden haer bevaert ende d’ander die te huijs wert ghinck, wert onder weghen zijn been alsoe seer swellende, dat hij niet gaen en conde. Doe quamen hem zijn gesellen weder aen en seijden hem, dat hij noch loven woude Onse L. Vrou te verzoecken mit een wassen been. Ende als hij dat gedaen hadde, zoe wert zijn been weder slijnckende. Ende hij quam hier ende dede zijn bedevaert.
