MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
44
Item het was een vrou van Hoorn, die iiij daghen hadde gegaen in arbeijt van kijnde, alzoe dat zij des niet genesen en conde. Doe was daer een, die haer seijde, dat zij t’Amersfoert Onse L. Vrou haer offerhande loven soude te seijnden. En terstont genas zij des kijnds ende zij seynden haer offerhanden tot Onse L. Vrou.
45
Item het was een man van Kuijck, die te Loen op d’Veluwe woende. Die had een kijnt van V iaer, dat op een tijt verveert wert, alzoer dattet legghen bleeff in onmachten. Ende des gelijcxs was op d’selve hoffstede veel menschen daer voertijts geschiet, alzoe dat zij lange quelden ende bleven croepel. Ende alzoe dit kijndt iij weecken dus gelegen had mitten aensicht iegens t’bedde, sonder eten ende drincken, datment niet omweijnden mocht, zoe quam daer een man rieden voer die duer, die tot des kijndts vader seijde: “Loeft u bevaert mitten kijnde tot Onse L. Vrou t’Amersfoert, dien haer beelde inden water gevonden is. U kijndt zall wel genesen, want ie was ooc blijnt mit een oghe ende dede mijn bedevaert ende wert weder siende.” Doe loeffde d’vader zijn bedevaert mitten kijnde ende begon weder spreeckende te worden en te eeten. Ten derden daghe leijde hij zijn kijndt op zijn waghen ende des nachts bleef hij onderweghen. Des morgens wordt dat kijndt gaende ende alst zijn bedevaert gedaen hadde, zoe ginck het bij hem selven vuijt der kercke weder.
46
Item was een vrouwe van Rijswijck, die een swell hadde in haer keel, daert vuijer aengecoemen was, alzo dat alle die meijsters haer overgaven ende seijden, dat zij daer aen sterven moste. Doe wert zij denckende op die genade die t’Amersfoert geschieden. Zij loeffde haer bevaert ende dat swel ghijnck doer ende zij wert gesont.
