MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
46
Item was een vrouwe van Rijswijck, die een swell hadde in haer keel, daert vuijer aengecoemen was, alzo dat alle die meijsters haer overgaven ende seijden, dat zij daer aen sterven moste. Doe wert zij denckende op die genade die t’Amersfoert geschieden. Zij loeffde haer bevaert ende dat swel ghijnck doer ende zij wert gesont.
47
Item het was een man, die doeff ende blijnt was. Hij loeffde zijn bevaert tot Onser L. Vrouwen ende hij wert wederomme siende ende hoorende.
48
Item het was een man van Bronckhorst, die een kijndt had, dat een iaer mit een oghe blijnt hadde geweest. Hij loeffde zijn bedevaert mitten kijnde ende het wert weder siende.
49
Item was het een vrouwe van Nijmmeghen, die lach dat zij acht daghen lanck geen macht en hadde haer een arm mit die siede ijet te rueren, alzoe dat haer niemant helpen en conde. Doe wert haer geseijt van haer buren, dat zij haer bedevaert loven soude t’Amersfoert. Ende doe zij haer bedevaert had geloeft, was zij des morgens gesont.
50
Item het was een man van Keppel, die beseten was van den boosen gheest. Hij hoerden segghen van Onser L. Vrouwen genade t’Amersfoert. Doe loefde hij se te versoecken ende hij wert verlost.
51
Item hier quam een knecht van Aernhem, die was des proebst dienre van Aernhem. Die had alzo groet lijeden in zijn hoeft langer dan een iaer, dat hij niet geslapen en conde. Hij loeffde zijn bevaert hier Onse L. Vrou te versoecken ende onderweghen, doe hij zijn bedevaert soude doen, wert hij int veldt aenslaep, eer hij aen d’stadt quam. Ende doe hij ontspranck, was hij gesont ende wel te passe.
