MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
51
Item hier quam een knecht van Aernhem, die was des proebst dienre van Aernhem. Die had alzo groet lijeden in zijn hoeft langer dan een iaer, dat hij niet geslapen en conde. Hij loeffde zijn bevaert hier Onse L. Vrou te versoecken ende onderweghen, doe hij zijn bedevaert soude doen, wert hij int veldt aenslaep, eer hij aen d’stadt quam. Ende doe hij ontspranck, was hij gesont ende wel te passe.
52
Item het was een vrou van Aernhem, die viij iaeren lanck groete zijecte aen haer been geleden had, alzoe dat haer in haer sinne quam, dat zij Onse L. Vrouwe t’Amersfoert versoecken woude ende haer offerhande brengen. Ende terstont heeft zij genade gechregen ende hier haer stock gelaten ende gesont wederomme t’huijs gegaen.
53
Item het was een man van Ammersso, d’in zijn been gebeeten was van een vercken, dat hij xiiij iaer open gedragen had, daer hij meijnighe meijsterie om dede ende hem niemant helpen en conde. Daer nae heeft hij hem in zijn ander been gehouden omtrent halff off, dart men hem t’huijs dragen most. Doe loeffde hij zijn bevaert t’Onser L. Vrouwen ende hem en wort geen meijsterie anders gedaen dan een plaester geleijt. Hij werd gesont binnen viij daghen mit beijde beenen.
54
Item het was een vrou van Wijck zijecke aent water, die haer beenen geswollen waren, dat zij spleeten ende wel hondert gaten in haer beenen had. Zij hoerden segghen van Onser L. Vrouwen genade t’Amersfoert ende loeffde haer bevaert Onse L.Vrou daer te versoecken ende zij wert binnen viij daghen gesont.
55
Item het was een vrou van Harlijnghen, die vijff daghen in arbeijt ghijnck van kijnde. Zij loeffde haer bevaert tot Onser L. Vrouwen t’Amersfoert mit den kijnde ende terstont nae d’beloften wert zij des genesen. Ende zij quam en dede haer bevaert.
