MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
56
Item het was een maghet van Harlingen, die xij weecken blijnt was aen die pocken. Zij hoerde segghen van die groete genade, die Maria, die Moeder Goedts, t’Amersfoert alle daghe thoende, daer zij haer bevaert loeffde ende zij wert gesont.
57
Item het was een vrouw van Wolsende, die inden bedde hadde gelegen xxiiij weecken lanck ende zij en conde haer niet rueren off weijnden. Zij loeffde haer bevaert Onse L. Vrouwe t’Amersfoert te versoecken mit een sonderlijnghe gebet van xviij graden. Ende zij creech haer gesondicheijt weder.
58
Item het was een wijff van Naerden, d’een kijndt had, dat verdrenct was ende zij en wisten t’anders nijet, dan t’kijndt all doot was. Die moeder loeffde haer bevaert tot Onser L. Vrouwen t’Amersfoert, dat kijndt te weghen mit wijn ende weijt, mit gout ende silver ende terstont ist kijndt levendich geworden.
59
Item op des heyligen Sacraments dach wert een man bestreden van zijn vijanden binnen Begberghen, die hem wachten; welck drie stercke mannen waren. Sij sloeghen ende staecken nae hem om hem doot te slaen. Ende doe hij onder die voeten lach, wert hij denckende op Onser L. Vrouwen, die haer beeldeken t’Amersfoert inden water gevonden was, die hij loeffde daer te versoecken, op dat hij daer nijet doot en bleve. Ende wat zij hem doe staecken ende sloeghen, zij en conden hem niet quetsen. Ende hij quam gesont ende ongequest vuijt haerluijden handen ende dede hier zijn bevaert.
