MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
60
Item het was een jonckman van Wijck, die alzoe bisinnich wort, dat men hem sluijten most. Zijn broeder loeffde zijn bevaert mit hem te doen tot Onser L. Vrouwen t’Amersfoert ende onder wegen, doe zij op die reijse waren, quam hij weder tot hem selven, alzoe dat zij hem ontsloten. Ende hij dede zijn bevaert sedelick ende biechte hem ende hij liet hem weghen mit wijn ende weijt, mit silver ende mit een pont wasch. Ende hij keerde gesont weder t’huijs.
61
Item het was een vrou van Groenijngen, die een maent lanck blijnt geweest had. Zij loeffde haer bevaert hier. Ende zij wert weder siende.
62
Item het was een maghet te Harderwijck, die opter straten, daer zij ghijnck spielen, beswijmde, dat zij iij uren lach, dat men meenden, dat zij doot was. Zij loeffde haer bevaert tot Onser L. Vrouwen mit ij ionckfrouwen. Ende zij wert gesont.
63
Item het was van Harderwijck een vrou, die seer belast was mitten water. Zij loeffde haer bevaert tot Onse L. Vrouwe t’Amersfoert, d’haer beelde daer gevonden is inden water, mit een wassen beelde van een pont was. En terstont is zij gesont geworden ende vrij vanden water.
64
Item het was een man vuijt den lande van Luijck, die gevangen was tot Bremen mit een ander man, die bij hem doot gepijnicht wert. Ende men liet hem gaen op een toorn, besloeten mit iij dueren. Doe quam hem in zijn sinne, dat hij zijn bedevaert loven soude tot Onser L. Vrouwen t’Amersfoert ende op den vierden dach hier nae vant hij all dese doeren open ende wijt ontsprongen ende ghijnck daer vrij vuijt. Ende quam en dede zijn bedevaert.
