MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
64
Item het was een man vuijt den lande van Luijck, die gevangen was tot Bremen mit een ander man, die bij hem doot gepijnicht wert. Ende men liet hem gaen op een toorn, besloeten mit iij dueren. Doe quam hem in zijn sinne, dat hij zijn bedevaert loven soude tot Onser L. Vrouwen t’Amersfoert ende op den vierden dach hier nae vant hij all dese doeren open ende wijt ontsprongen ende ghijnck daer vrij vuijt. Ende quam en dede zijn bedevaert.
65
Item het was een man van Begbergen, die zijeck was aen die steen, alzoe dat hij lach ij daghen en ij nachten, dat hem niemant lijff en gaff. Doe loeffde hij zijn bedevaert mit een keers van een pont wasschen. Doe ghingen hem off iiij steenen ende heeft gesont hier zijn bedevaert gedaen.
66
Item het was een vrou vander Goude, die hier een kijndt brocht, dat alzoe seer geswollen had geweest aen zijn manlickheit, alzoe dattet binnen viij daghen zijn water nijet en conde gemaecken ende het t’eijnde begonne all swert te werden. Doe wert haer geraden, dat zij Onse L. vrouwe t ‘Amersfoert versoecken soude ende terstont doe zij dat geloeft had, wert dat kijndt zijn manlickheijt lopende ende is gesont geworden.
67
Item op den selfden dach, doe men hier Onse L. Vrouwen processie dede om d’stadt ende veel volcxs hier bevaert gecoemen was, sonderlijnge vuijt die stadt van Utrecht. Des avonts, als dat volck weder t’Utrecht quam, doe saten een deel ionger mannen in een herberghe te samen ende spraecken spottelicke woerden op Onser L. Vrouwen beeldt, dat t’Amersfoert inden water gevonden wert. Sich, een van die sievenen, die daer meest mede spottende, quam terstont een brocke broets in zijn keel, dat hij also swert wert om zijn hoeft, dat zijn gesellen meenden, dat hij terstont gestickt soude hebben. Daer loefden zij altesamen haer bevaert tot Onser L. Vrouwen ende nemmermeer daer mede spottende te zullen zijn. Ende hij is weder tot zijn selven gecoemen ende heeft mit zijn gesellen hier zijn bevaert gedaen.
