MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
72
Item het was een wijff van Utrecht, die vj daghen lanck bijster haerer sinnen hadde geweest. Doe quam haer buer en seijde, dat zij haer bevaert loven soude tot Onser L. Vrouwen t’Amersfoert. Ende doe zij dat gedaen had, creech zij rechtevoert haer sinnen weder.
73
Item het was een vrou van Culenburch, die boven hondert gaten aen haer beenen had, daer zij geen readt vanden meijsteren offchriegen conde. Zij loeffde haer bevaert tot Onse L. Vrou t ‘Amersfoert ende die gaten zijn genesen ende weder toe gegaan.
74
Item het was een kijndt van Dieveren verdroncken ij uren lanck. Die moeder loeffde haer bevaert tot Onse L. Vrouwe mitten kijnde ende het is weder geworden levendich.
75
Item het was een wijff van Campen, die alzo seer beladen was mitten water, dattet haer doer die huijdt drang en de haer niemant lijff en gaff. Doe wert haer geseijt, dat zij haer bedevaert loven soude tot Onser L. Vrouwen t’Amersfoert, die haer beeld daer inden water gevonden is. Ende doe zijt geloeft had, rechtevoert verghijnck haer dat water bij hem selven, dat zij nijet en wist, hoe zijt quijt wordt.
76
Item het was een man van Onsel bij Harderwijck, die een kijndt had, dat gestickt was aen die hoest een ure lanck, alzo dat hij meenden, dattet doot was. Hij loefde zijn kijnt te wegen mit wijn ende weijt voor Onse L. Vrou en terstont isset levendich geworden. Ende hij dede zijn bevaert, als hij geloeft hadde.
