MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
77
Item het was een man van Campen, die zijn keel vij daghen toegeswollen was, dat hij nijet eten noch drincken en conde. Doe loefde zijn wijff haer bevaert tot Onse L. Vrouwe t’Amersfoert ende hij wert terstont genesen.
78
Item het was een man vanden Bosch ende had in beijden beenen alzo grote pijne xij daghen lanck, dat zij all iamer aen hem saghen, die bij hem waren. Doe quam hem in zijn sinne, dat hij zijn bevaert loeffde tot Onser L. Vrou t’Amersfoert ende binnen vij uren daer nae wert hij gesont ende dede zijn bevaert.
79
Item het was een man vanden Bosch zijeck aenden water. Hij loeffde zijn bevaert tot Onse L. vrou tot Amersfoert ende hij wert genesen ende dede hier zijn bedevaert.
80
Item het was een vrou van Culenburch, die had een aposteemij in haer lijff. Ende zij hoerden segghen vandie ghenaden, die daer geschieden t’Amersfoert tot Onse L. Vrou. Zij loefde haer bevaert ende zij wert gesont.
81
Item het was een schipman mit eenen kreijer van LXX last, gezeijlt op die haken buijten Tessel ende dat schip dat schuerde dat boert vanden kijell, dat men daer mit een voet doer treden mocht, dat zij anderhalven dach ende een nacht pompten om haer lijff te bergen. Ende daer waren xxx mannen in den schepe. Ende een van hem allen sprack: “Loeft Onse L. Vrou t’Amersfoert mit eenre cleijne gave te versoecken.” Ende die schipper dede alzoe ende binnen een halff ure daer nae pompten zij dat schip all droghe ende zij meenden, dat die pomp gebroecken had geweest. Ende zij braecken die luecken op ende doe was dat schip droghe. Ende zij waren seer verblijt. Ende die scieter was aen den kijell gesloten, dat zij nijet en lecte. Ende zij zijnt blijde licken verlost ende te landt gecoemen, dat zij God ende Onse L. Vrouwe danckten. Ende zij deden haer bevaert.
