MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
81
Item het was een schipman mit eenen kreijer van LXX last, gezeijlt op die haken buijten Tessel ende dat schip dat schuerde dat boert vanden kijell, dat men daer mit een voet doer treden mocht, dat zij anderhalven dach ende een nacht pompten om haer lijff te bergen. Ende daer waren xxx mannen in den schepe. Ende een van hem allen sprack: “Loeft Onse L. Vrou t’Amersfoert mit eenre cleijne gave te versoecken.” Ende die schipper dede alzoe ende binnen een halff ure daer nae pompten zij dat schip all droghe ende zij meenden, dat die pomp gebroecken had geweest. Ende zij braecken die luecken op ende doe was dat schip droghe. Ende zij waren seer verblijt. Ende die scieter was aen den kijell gesloten, dat zij nijet en lecte. Ende zij zijnt blijde licken verlost ende te landt gecoemen, dat zij God ende Onse L. Vrouwe danckten. Ende zij deden haer bevaert.
82
Item het was een wijff van Campen d’groff was vanden water. Ende zij loefde haer bevaert tot Onse L. Vrouwe t’Amersfoert, die gevonden wert inden water, ende doe zij hier quam, doe kroep die dochter driewerff op haren bloten knijen om dat kerckhoff ende alzoe in die kerck voor Onse L. Vrouwe. Ende die moeder wert gesont.
83
Item het was een man van Bunschoten, die voer in die zee ende hij viel over boert mit t’hoeft bij die gront ende hij meende verdrenct te zijn, want hij en hadde geen gront ende sat een ure in die see. Ende hij wert denckende aen Onser L. Vrouwen genade t’Amersfoert ende hij loefde die L. Vrouwe te versoecken ende hij is verlost vuijt den water. Ende heeft zijn bevaert gedaen.
84
Item het was een man van Memelijck ende soude varen in die Vecht ende verloer zijn roerer van dat schip, een natmael. Ende hij loefde zijn bevaert Onse L. Vrou t’Amersfoert te verzoecken mit een wasschen roerer. En des smorgens sach hij vuijt ende dat roerer dreeff bij den schepe. Ende hij nam dat roerer ende settent aent schip ende voer ende danckte Onse Lieven Heer ende Onse L. Vrou. Ende dede zijn bevaert.
