MIRAKELBOECK
ONSER LIEVER VROUWEN
‘T AMERSFOERT
Uitgave ‘Het Onze Lieve Vrouwe Gilde”
Amersfoort 1946
84
Item het was een man van Memelijck ende soude varen in die Vecht ende verloer zijn roerer van dat schip, een natmael. Ende hij loefde zijn bevaert Onse L. Vrou t’Amersfoert te verzoecken mit een wasschen roerer. En des smorgens sach hij vuijt ende dat roerer dreeff bij den schepe. Ende hij nam dat roerer ende settent aent schip ende voer ende danckte Onse Lieven Heer ende Onse L. Vrou. Ende dede zijn bevaert.
85
Item het was een man van Delft, die had een kijndt, dat blijnt wert, alzoe dattet op den thienden dach quam. Doe loeffde hij zijn bevaert t’Amersfoert voor Onse L. Vrou mit zijn kijndt ende mit twe wasschen oghen. Terstont is dat kijndt siende geworden ende quam en dede zijn bedevaert tot Onse L. Vrou t’Amersfoert.
86
Item het was een wijff van Leijden, die aen d’terijnghe also seer verteert was, dat zij geen vleijsch om haer dije off om haer beenen en had. En d’meijsters seijden, dat zij emmer sterven most. Doe loeffde haer moeder haer bevaert mit haer dochter tot Onser L. Vrouwen t’Amersfoert ende terstont betert het weder, buten raedt van enighe meijsters. Ende zij quamen en deden haer bevaert all hier.
87
Item het was een wijff van Campen ende viel bij nacht vuijt een schip in een diep water ende zanck neder op die gront. Doe leijde zij haer handen te samen ende zij docht op Onser L. Vrouwen beeldt, dat gevonden was inden water, t ‘Amersfoert ende een schipknecht stack van wanscicht een boem int water op haer lijff. Ende zij griep die boem ende quam daer bij weder op. Ende zij quam en dede haer bevaert all hier.
88
Item het was een wijff van Leijden, die was haer lijff alzo groet geheven ende die meijsters conden nijet over een coemen, wat het wesen mocht. Alzoe ghijnck zij quijnden anderhalff iaer. Ten laesten viel zij te bedden ende bleeff leggen xij daghen, dat d’meijsters geen raedt en wisten. Doe loeffde zij haer bevaert t’Amersfoert tot Onse L. Vrou ende haer lijff wert weder slijnckende, dat zij niet en wist, hoe zijt quijt wert. Ende zij quam en dede haer bevaert all hier.
